معقول الطالب اللي ما درس طول الفترة الماضية ممكن ينجح؟
وممكن حد يلحق يخلص في الفترة اللي ضايلة ويجيب معدل عالي؟
ندرس من الكتاب ولا الملخص؟
اسئلة تجريبي السنة ولا سنوات سابقة؟؟
كثير من الطلاب بسألوا نفس هذي الاسئلة
اول شي اللي ما درس طول الفصل وبدو ينجح هسا:
الوضع الطبيعي انك تدرس من بداية السنة لحتى تقدر ترتب المعلومات بعقلك وتعطيه الوقت ليستوعب كل المعلومات، لكن معظمنا ما بنقدر نجبر حالنا ندرس اول باول وبفوتنا الوقت واحنا نحكي اليوم وبكرا، لكن الجواب هو "اه بتنجح" بمشيئة ربنا طبعاً لانو عقل الانسان وقت يكون محصور بالوقت بعطي افضل انتاجية.
مثال على هالشي وقت تكون بتدرس طول اليوم وبتحس حالك نسيت كل شي، لكن في الامتحان يلي مدته اقل من ساعة بتلاقي عقلك استرجع كل المعلومات يلي درستها طول اليوم واعطى افضل انتاجية، هالشي سببه ان عقلك ما عاد يهتم بالمشتتات يلي حوليه وصار كل تركيزه في المادة يلي بايدك.
لهيك بالوقت اللي ضايل لازم تقتنع انو خلص هذي اخر فرصة ومش رح يكون معك فرصة غيرها وتبدأ تدرس بشكل جدي.
السبب الثاني يلي ممكن يحبطك ويخليك تتكاسل هي كثرة المراجع والملخصات، انت فعليا بتكون محتار من اي مصدر تدرس، في كثير ملخصات مفيدة، لكن اهم شي هو الكتاب، اضمن انك فاهم كل شي بالكتاب وحال كل الاسئلة وبعدها مش مهم ايش الكراسة يلي رح تحل منها الاسئلة الاضافية لانو هدفك منها هو انك تحل عدد اسئلة وافكار اكثر لحتى تفهم الموضوع.
صفحة المنهاج الفلسطيني الجديد
طيب ندرس على اسئلة التجريبي ولا السنوات؟
انا مش مع انك تشتت نفسك كثير، بالنهاية اذا كنت فاهم الموضوع رح تقدر تحل اصعب الاسئلة ساعة الامتحان، مثل ما قلتلك قبل وقت الامتحان عقلك بعطي افضل انتاجية، وممكن سؤال ما كنت عارف تحله وانت بتدرس تقدر تحله جوا الامتحان لان عقلك رح يطلع كل المعلومات لان الوقت محصور.
مش غلط لو حليت اسئلة سنوات سابقة لانو الامتحانات كل سنة بتجي عنفس النمط.
وامتحانات السنوات اهم من التجريبي لانها بتعطيك لمحة عن طبيعة الامتحان اكثر من التجريبي، وبرضو اذا كان معك وقت اختارلك امتحان تجريبي من مديريتك وحلها بس مش ضروري تحل كل امتحانات التجريبي الموجودة.
وبالنهاية انت اعمل اللي عليك وما تفكر بالعلامة، لان المعدل يلي رح تجيبه هو رزق من ربنا، وكل واحد رزقه مكتوب ، هم شي انك تسعى وما توقف ولا تخلي اي شي يحبطك.
عمر برادعية
